كتب الصحفي المصري باسم عزمي، (أحد أشخاص الوفد الإعلامي الذي وصل غزة )، عن أهم الانطباعات التي رآها خلال رحلة برنامج صباح الخير يا مصر في القطاع.

وقال عزمي، في منشور له: "في الشوارع لقيت علم فلسطين، وعلم مصر خارج من شبابيك العمارات، ومرسوم في الطرق، ومفيش علم أي بلد تاني، و شفت تيشيرت الأهلي، وقريت شعارات للزمالك على الحيطان ، ومشفتش أي نادي تاني، ولا حتى أندية فلسطين، والنقاش عن الأهلي، والزمالك مع أي فلسطيني لا ينتهي".

وفيما يلي نص ما كتبه الصحفي المصري عبر صفحته على "فيسبوك":

أهم الانطباعات عن رحلة برنامج صباح الخير يا مصر في غزة..

- عارف لما تكون مسافر و بعدين ترجع فجأة و تلاقي أخوك مستنيك بلهفة .. أنا حسيت الإحساس ده مع استقبال أول واحد لينا على المعبر و فضل الإحساس مكمل طول الرحلة.

- في الشوارع لقيت علم فلسطين.. و علم مصر خارج من شبابيك العمارات و مرسوم في الطرق و مفيش علم أي بلد تاني.. و شفت تيشيرت الأهلي و قريت شعارات للزمالك على الحيطان .. و مشفتش أي نادي تاني .. و لا حتى أندية فلسطين.. و النقاش عن الأهلي و الزمالك مع أي فلسطيني لا ينتهي.

- سمعت حكيم و عمرو دياب و حمو بيكا و أم كلثوم و أنغام و مطربين مصريين كتير جدا في المحلات و الأفراح و العربيات.. و سمعت أغاني شامي بس أقل كتير.

- المعيشة غالية.. لتر البنزين ب 6 شيكل يعني حوالي 30 جنيه.. و البيبسي ب 2 شيكل يعني 10 جنيه.

- تقريبا محدش مننا احتاج يصرف حاجة طول الرحلة.. حتى و أنا عطشان وقفت أجيب مياه و صاحب السوبر ماركت سمع اللهجة و رفض ياخد فلوس و بجد الناس لما بيسمعونا بنتكلم مصري في الشارع بيوقفونا و يعزموا اننا لازم ناكل و نشرب.. و عموما أنا شخصيا اتعزمت بطرق كتير.

- التليفزيونات مشغلين قنوات مصرية على طول و الإفيهات المصرية الجديدة مفهومة جدا .. و مسلسلات رمضان اللي فات محفوظة في غزة.

- أصدقاءنا اللي اشتغلنا معاهم من فلسطين قمة في الاحتراف و التفاني في العمل.. عملوا كل حاجة علشان يحلوا معانا المشاكل اللي قابلناها و يخلوا الحلقة شكلها حلو و محدش منهم نام يومين متواصلين.

- ناس كتير قابلناهم كانوا سعداء جدا بزيارتهم لمصر زمان أو قريب و وقفونا علشان يحكولنا عن التغيير اللي شافوه في الطرق في مصر الجديدة.. أو عن رحلة اسكندرية الأخيرة و أكلة جيلاتي عزة على الكورنيش.

- الشوارع في غزة عموما شبه شوارع المصايف القديمة في مصر "رأس البر.. أو جمصة مثلا" و المناطق الراقية شبه بورسعيد.

- الأكل زي الأكل الشامي.. حلو جدا بس حراق على الآخر.. و الحلويات شامية برضو بس بنكهة مختلفة.

- كنت بحب أتكلم مصري و أنا ماشي في الشوارع علشان اتفرج على رد فعل الناس و هما بيسمعونا بنتكلم.

شكرا يا مصر

شكرا صباح الخير يا مصر

وشكرا لرفقاء الكفاح في الرحلة

المصدر : وكالة سوا