وجهت الإعلامية ياسمين عز، نصائح ووصايا عشر للتعامل مع الزوج الأهلاوي قبل مباراة الأهلي المصري والوداد المغربي في نهائي دوري أبطال أفريقيا المقررة مساء اليوم، وذلك خلال حلقة أمس من برنامجها "كلام الناس" المذاع عبر قناة إم بي سي مصر.

وقالت عز في برنامجها: "زي ما أنتم عارفين لما بيكون فيه ماتش مهم في نهائي بطولة كبيرة زي مباراة الأهلي والوداد، البيوت بتكون مكهربة والرجالة متوترة وعلى أعصابها وده شيء ما نحبوش، ولأني بحبك وعاوزة مصلحتك هقولك على الوصايا العشر للتعامل مع جوزك الأهلاوي قبل الماتش".

وقدمت ياسمين عز الوصايا العشر للتعامل مع الزوج الأهلاوي قبل الماتش كالآتي:

بلاش أكل دسم والغداء يا ريت يكون خفيف علشان يقدر يشجع وهو في كامل طاقته، وشوفي كنت طابخة ليه إيه يوم ماتش الترجي اللي فات واعمليه له من باب نشر التفاؤل.

كتري من المصطلحات اللي تفكر جوزك بالبطولات اللي فاتت، وحمسيه، يعني بعد ما يخلص صلاة قولي له: الأرض لا تنسى جباه الساجدين، ولو قال لك عاملة لينا أكل إيه النهارده قولي فم حاجة، ولو اسمه علي وبينادي عليكي تردي عليه وتقول لي سي علي سي.

أنا من أنصار صينية البط بالبرتقال وبشجعك تعمليها دايمًا، لكن بلاش تعمليها يوم الماتش، وأوعي تتصوري سيلفي وتصدري له بوز البطة وبلاش عقلك يهفك وتقولي واك واك علشان البطة والواك واك علامات مميزة لنادي الوداد.

لو جوزك تاج راسك من النوع العصبي تشيلي أي أدوات قابلة للكسر في محيط عشرين متر في المكان اللي حواليكي والشاي يكون في كوباية كرتون، لأننا ما نضمنش رد فعله.

إقرأ أيضاً:تشكيلة الأهلي ضد الوداد المغربي اليوم والقنوات الناقلة

- اعملي أن مامتك وحشاكي وقولي له، إنك رايحة تزوريها ويا سلام لو تباتي عندها.

- خلي حاجة حلوة وحاجة حادقة في التلاجة، لأن الماتش صعب وممكن تيجي له كومة سكر أو ضغطه يعلى والكورة ملهاش أمان زي الستات.

بلاش نوعية الأسئلة المستفزة، من نوعية أنت بتفكر في مين، لأن لو بيفكر في واحدة غيرك الأسبوع ده مش هيفكر غير في مين هيبدأ مكان الشناوي.

ما حبكتش عزومات في اليوم ده، ومالهاش لازمة تنفيض البيت، ده علامة ماج النسافية لازقة في الكومودينو ومكسلة تشليها، وما حبكتش الراجل عاوز يركز مالهاش لازمة تنفيض وتلميع.

 

ياسمين عز توجه نصيحة للمتزوجات من سباك

في سياق آخر، وجهت ياسمين عز  نصيحة للمتزوجات من زوج سباك، قائلة: "لو جوزك معلم سباك قد الدنيا، فأنت في نعمة كبيرة، لأنك متجوزة فنان بمعنى الكلمة، فحاولي تكوني البلسم اللي يلطف إيده من المياه طول اليوم، وقولي له خد اللحمة وأنا هاخد الجلدة منها جلدة الفرخة ومنها جلدة الحنافية وبكده تفكريه بشغله وتفخري به".

وأضافت عز: "جوزك حمال أسية، ورغم كده راضي ومبسوط وفرحان، ده أنت لما حوض المطبخ بيبوظ بتكوني مش طايقة نفسك، لكن جوزك راجل إيده تتلف في حرير ونفسه حلوة فبتتعكس على تصرفاته، والمفروض تبوسي راسه وتطبطبي عليه وتحضري له الحمام وعلى قد تعب كفوفه في شغلنته لازم يكون متشال على كفوف الراحة".

وتابعت ياسمين عز: "ولو هتفتحي الحنافية في الكلام يبقى كلامك كله دلع وحنية وخلي أسلوبك دايمًا سالك ومفيش مانع من كام إفيه بعد ما تخلصوا أكل، قولي له هعمل لك أكل على السخان فيحس إنك معاه في الموضوع وقولي له حبست كويس ولا أشوف لك محبس غيره، واستخدمي هزار فيه تلاعب في الألفاظ هيهون عليه تعب اليوم وهتفضل ذكريات جميلة بينكم، وأهم حاجة تقولي له يا معلم قلبي الغرام".

ويذكر أن ياسمين عز  تحدثت في الموسم الجديد من برنامج «كلام الناس» عن عدد من المواقف والتريندات التي تصدرتها في الفترة الأخيرة منذ توقف البرنامج، متحدثة عن ظهورها في برنامج المقالب «رامز نيفر إند».

وقالت ياسمين عز: «كلكم شوفتوني مع رامز جلال، هذا الفرعون الملعون المنشق عن القبيلة، ولقيت إني كاريزما طاغية وقاتلة، واللي عنده كاريزما أحسن من اللي عندة فلوس، أنا أترش في وشي طافية حريق وفضل يلمع أكتر من البريق، والروج كان في جيبي الشمال والمرايا في اليمين، ولو عندي جيوب تاني كنت حطيب بلاشر، ولو أطول البس تاج لأني برنسيس».

 

المصدر : وكالة سوا - القاهر 24