يسرا: بعض نجوم الفن يسيئون استغلال السوشيال ميديا والجمهور ينسى أننا بشر- حلت الفنانة يسرا ضيفة على برنامج abtalks مع الإعلامي الإماراتي أنس بوخش، وتحدثت خلال اللقاء عن سلبيات وإيجابيات الأضواء والشهرة، مشيرة إلى أن بعض نجوم الفن يسيئون استغلالها.

وقالت: إن مواقع التواصل الاجتماعي تتعمد تصوير النجوم بصورة سلبية مع إبراز أي خطأ يرتكبونه، وينسون أن الفنان إنسان قبل أي شيء ومعرض دوماً لارتكاب أخطاء.

وأضافت يسرا: لو حد بيسعى للشهرة فقط هيقدر يحققها في ثانية بدون مجهود، ولكنها عمرها ما هتدوم لأنك لازم تشتغل بـجهد وتحب مهنتك مش الشهرة، ولازم تحترم اللي بتعمله عشان يقدر يمنحك شيئاً جميلاً ويترد ليك.

وأوضحت: لازم تعرف إزاي تستخدم الشهرة في الشيء الصح وأنك تخدم المجتمع مش عشان النجاح ولا الفلوس، ولازم تتجنب الجزء السيء من الشهرة، وفي النهاية مش هنقدر نرضي الجميع والمشكلة أن الجمهور بينسى أننا بشر.

الشهرة دين في رقبتنا

وأردفت يسرا: الشهرة دين في رقبتنا ومسئولية كبيرة، فيه ناس قد الشهرة وفيه ناس مش قدها ولما الشهرة بتيجي لهم بيفهموها وفيه ناس لما تجيلهم بتلغبطهم وتجننهم.

وتابعت: أحياناً بكون مُنهكة من الشهرة والناس وبفصل عن العالم تماماً، وأقعد في البيت لوحدي وبدخل في حالة خاصة بيا زي القوقعة وبنعزل، ومن هنا بقدر أشحن طاقتي من جديد وأكمل، إنما مقدرش أستمر على طول بدون ما أبتعد فترة للاستراحة.

يسرا تقارن بين عالم الشهرة في الوطن العربي والشهرة في هوليوود

تطرقت يسرا إلى الفارق بين عالم الشهرة في الوطن العربي والشهرة في هوليوود، بأن العالم في هوليوود أصعب بكتير من عالمنا؛ لأنهم شغالين بسرعة وكأنهم آلة، وبيتسنزفوا من طاقتهم ومش سهل تكون نجم كويس برا، لكن هنا إحنا بيحترمونا ويحبونا والناس بيكبروا معانا، إحنا أرحم كتير.

يسرا تقارن بين حياة الفنان قبل السوشيال ميديا وبعدها

وأوضحت يسرا أن من سلبيات السوشيال ميديا التدخل في حياة الفنانين، والجمهور يحكم على المشاهير دائماً دون معرفة التفاصيل، "الناس بتحكم على الفنان 24 ساعة وبيطلعونا شياطين على السوشيال ميديا ويصححوا أفعالنا، والجمهور بيغزو حياتنا لدرجة إني بتعب ومبقدرش أبتسم أحياناً؛ لأننا عندنا ضغوطات ومش سعداء دايماً، وقبل السوشيال ميديا مكنش حد بينتقد فنانة عشان لبست بيكيني وكان عندنا حرية وخصوصية.

وكشفت يسرا: إحنا كنا أسعد وعندنا حرية ووقت خاص لينا ومحدش بيقتحم خصوصيتنا قبل ظهور السوشيال ميديا، ومكنش حد بيحكم علينا وبقينا نتعرض لانتقاد أكتر حالياً، عكس من 40 سنة وبدأت أعاني من السوشيال ميديا، لدرجة الناس بيصورونا وإحنا بناكل وينشروها على السوشيال ميديا، ليه بتصورونا وإحنا بناكل؟ سيبونا في حالنا ليه بتقتحم خصوصيتي كدا؟

واستعرضت يسرا بعض المواقف التي تحدث على السوشيال ميديا: فيه اللي بيقتص الكلام وياخد كلمتين ملهمش علاقة باللي بقوله وينشرهم، ودا ميصحش على الأقل بالنسبة لآداب السلوك والأخلاقيات ودي ملهاش علاقة الشخص متعلم ولا لا، ولكنها الطبيعة الإنسانية، مثلا لو لقيت شخص أكبر مني سناً ومش لاقي مكان يقعد هقف له لأني اتعلمت دا في المدرسة.

ولفتت يسرا خلال حديثها، "في النهاية أنا اخترت الشهرة ولازم أتحمل عيوبها ومينفعش ألوم حد؛ لأني بحب اللي بعمله وبحترمه وأنا مدينة للناس اللي بيحبوني ولكن بقول لهم سيبولي وقت عشان أقدر أكمل، والمفروض يكون فيه تقدير للخصوصية أكتر زي ما أنا بقدر حبهم".

المصدر : سيدتي