رد الفنان المصري فاروق فلوكس على استهزاء الفنان محمد رمضان على دوره في فيلم "الراقصة والسياسي"، والذي لعب فيه فلوكس دور صبي العالمة.

وقال فلوكس: "أعتقد أنه شافني في الدور وهو صغير، ولكن مكانش يقدر يقول الكلام ده قبل ما يجيله الملايين اللي بيكسبها دلوقتي، وبقا بيتكلم بفلوسه مش بلسانه، وأنا مش زعلان من كلامه". 

وتابع: "زي ما هو ميقبلش يعمل دور صبي عالمة أنا كمان لا أقبل تجسيد شخصية بلطجي أو واد صايع بسكينة في الشارع، لأن أعماله مسيئة للفن المصري والشباب، وهو دخل في حتة مش بتاعته، لإنه هاجم فريد شوقي، فهل المنطقي كل واحد ياخد كام مليون ييجي يهاجم الكبار.

واستعرض فاروق فلوكس بعض أدواره: "أنا ماعملتش دور صبي الرقاصة فقط، أنا عملت أدوار تانية مهمة، وكتير فالجيل الحالي يتمنوا يقدمو نفس الأدوار دي، وده لأهميتها، مشيرًا: عملت دموع في عين وقحه، بطولة عادل إمام، ودي لغة الفن اللي مابتمشيش بنوعية واحدة، جميع أدواري اللي قدمتها على مدار مشواري الفني بقدم شخصيات مختلفة، وهي دي اللي الناس بتصدقها.

محمد رمضان والعلاج نفسي

وقال فرد فلوكس: محمد رمضان ممثل كويس ماقولناش حاجة، بس لازم يروح يعالج نفسه عند دكتور نفسي.

وأضاف: كون أنه دايمًا بيقارن نفسه بالكبار، وبيقلل من قيمتهم الفنية والشخصية، وهو لسه مهما كان مابقالوش كتير في الساحة الفنية، يدل على أنه غير سوي، وأنه من الشخصيات الحقودة دائما على الأنجح منه، وهو شاء أو أبى فهو جنب فريد شوقي وغيره من زمن الفن الجميل فنان صغير جدًا طبعًا”

وأكمل: "اللي يعيش عصر فريد شوقي هيعرف أن مكنش في شباب بيمسك السلاح في أيده وهو رايح الفرح، ولا كان فيه شباب بتقتل عشان المخدرات، زمان كل الشباب رجالة بجد عشان كان فيه حاجة اسمها حرب، وهو طبعا استحالة هايفهم حاجة زي كده.

وتابع دفاعه عن وحش الشاشة: "فريد شوقي كان الملك في المجال ولازال الملك، لكن أنت بقا ملك ايه.. ملك الحواري للشوارع والعيال البايظة، ولا ملك المهرجانات والإسفاف، لا بد من معالجة محمد رمضان نفسيا مع احترامي ليه وهو ممثل شاطر".

ونصح فلوكس محمد رمضان: أرجو منك متهاجمش القمم القديمة ولا الحديثة، عمر حد مننا طلع قال أنا نمبر واحد في العالم، ليه يا محمد يابني ده من تواضع لله رفعه.

محمد رمضان يهاجم فاروق فلوكس

وكان الفنان محمد رمضان قام بمهاجمة الفنان فاروق فلوكس، خلال لقائه الإعلامية نجوى إبراهيم المذاع على قناة النهار، وقال: "فيه فنان كبير عمل أشياء أرفض أن أفعلها، عمل أدوار صبي عالمة ولو هشحت مش هبقى زيه ولا هاقدم الأدوار دي".

ودخل على خطط الردود الفنان أحمد فلوكس نجل الفنان فاروق موجها كلامه لمحمد رمضان: "أنت طبعا هترفض دور صبي الرقاصة عشان انت نمبر 1 وعينك على دور الرقاصة نفسها، وفعلا أنت أخلاقك أخلاق صبي رقاصة".

المصدر : الفجر