تداولت صفحات إخبارية في مواقع التواصل الاجتماعي، يوم الأحد 5 تموز 2020، خبر إصابة محمد صلاح نجم ليفربول الإنجليزي بفيروس كورونا ، بعد وفاة شقيقة والده الكبرى بالمرض في مصر.

ونفت وسائل إعلام مصرية، الأنباء حول إصابة اللاعب محمد صلاح بفيروس كورونا، مشيرة إلى أن أحد الفنانين الشباب يحمل اسما مشابها هو الذي أصيب بالمرض يوم السبت الماضي، ويتلقى العلاج.

وكتب الفنان محمد صلاح آدم عبر فيسبوك: بكتبلكم وأنا على سريري في مستشفى صدر العباسية، وبعد عمل أشعة مقطعية على الصدر التي أكدت أني أصبت بالوباء اللعين وقالولي اتأخرت ليه.

وفيما يلي نص ما كتبه محمد صلاح آدم:

بكتبلكم وانا على سريري في مستشفى صدر العباسية وبعد عمل أشعة مقطعية على الصدر اللي أكدت اني أصيبت بالوباء اللعين وقالولي اتأخرت ليه .. يمكن تكون آخر كلمات ليا في الدنيا دي.. اترددت كتير بس لقيت نفسي مش قادر وبكتب لأني حسيت احساس غريب، حسيت إني مش خايف من الموت. 

أنا خايف اني اموت قبل ما أشوف النجاح، استغربت وقولت لنفسي انت مش خايف من الموت ؟؟؟ قولت والله لا .. انا خايف اموت قبل ما أشوف نجاحي، بلدنا بقى الحلم فيها إنك بس تشتغل، أنت بس بتحاول طول الوقت إنك تشتغل، وتخبط على البيبان وكل البيبان بتتقفل في وشك. 

شباب في اول عمرهم وشباب بقوا رجال ورجال أصبحوا كهول وبنات وسيدات موهوبين خريجين المعاهد والكليات الفنية وماوقفوش أمام كاميرا، واللي هاجر واللي اكتأب واللي انتحر، اجمل مافي الوجود الحلم والطموح واقبح مافي الوجود عدم تحقيق الحلم أو الطموح ده. 

ارجوكم يا أصحاب الاختيار في شركات الإنتاج من المخرجين ومساعديهم أو مديري الإنتاج أو المنتجين الفنيين او المشريفين على الانتاج او أصحاب الورش الفنية أو الكاستينج دايريكتور أو صاحب المنتج الفني أو أو، الموهوبون في مصر كتيييير واللي ضيعوا عمرهم في حب الفن ودراسته سنين كتييييير لكن معندهمش واسطة ولاصاحب ولا قريب مخرج ولا منتج ولا منتج فني ولا ابن نجم برضه كتييييير قوي. 

أنا كل اللي بتمناه العدل، إن الموهوبين دول ياخدوا فرصة من الفرص الكتيييير قوي دي، معرفش ازاي ممكن يتحط النظام، اللي بيه كل الموهوبين الدارسين أعضاء نقابة المهن التمثيلية ياخدوا فرصة، واللي يثبت نفسه يكمل واللي مايثبتش نفسه الجمهور هايقول عليه لا، بس بعد ما يكون اخد الفرصة. 

فكرت ولقيت أن انسب حل، وانا يمكن ماحضرش تنفيذه أو حتى الموافقة عليه، هو عمل بروتوكول ملزم بين الدكتور أشرف زكي بصفته نقيب فنانين مصر ورئيس اكاديمية الفنون المصرية، على فكرة أكاديمية الفنون في امريكا هي اللي بتمنح جائزة الاوسكار، والأستاذ تامر مرسي بصفته رئيس مجلس إدارة الشركة المتحدة للخدمات الاعلامية اكبر وأهم شركة انتاج في الشرق الأوسط . 

وطبعا بعد كده ممكن كل شركات الانتاج والمخرجين يمضوا ويفعلوا نفس البرتوكول واللي لازم الجميع يتفق على بنوده وصياغته وانا عندي ثقة كبيرة في كل القائمين على هذه الصناعة الكبيرة والعظيمة وفي قائدنا الحكيم المخلص السيد الرئيس عبد الفتاح السيسي اللي اكيد هايرحب بالعدل أو شكل من أشكال تحقيق العدالة، ويارب لو اتحقق الحلم ده، وكنت يعني لاقدر الله مت ابقى مت وانا مستريح وسيبت لاولادي مايفخروا بيه.

بروتوكول الموهوبين
محمد صلاح آدم ممثل اول وزارة الثقافة المصرية وخريج أكاديمية الفنون المعهد العالي للفنون المسرحية قسم التمثيل والإخراج بتقدير جيد جدا.