ردت الفنانة المصرية لقاء الخميسي على جمهورها، أمس السبت، بشأن الانتقادات الموجهة إليها بسبب إطلالتها الأخيرة فى مهرجان القاهرة السينمائى، فى دورته الأربعين، التى عقدت بدار الأوبرا المصرية.

وقالت الفنانة "الخميسي" في بيان صدر عنها: "مساء الخير.. كلامى النهاردة للناس اللى بتحبنى من قلبها واللى انا بحبها وباحترمها.. الناس اللى كانت فى منتهى الأدب فى تعليقاتها عن آخر لوك ليا فى ختام الدورة الأربعين من مهرجان القاهرة السينمائى.. باحترام آرائكم اللى نابعة عن حب وخوف وأقدرها جدًا.. لكن حبيت أوضحلكم رأيى لو تكرمتم".

وأضافت: "فى حياة الممثل أو الفنان فى العموم شخصيتين.. شخصية كإنسان طبيعى فى بيته ومع أهله وصحابه.. وشخصيته كفنان مع جمهوره والناس اللى بتحبه وبتتابعه وشخصياته الكثيرة فى أعماله.. مع أهلى وصحابى أنا هو أنا وعلى طبيعتي في أغلب أوقاتى من غير ماكياج لأنى باحب نفسى طبيعية الحمد لله.. وكتير اشارككم فى لحظاتى.. وشخصيتى فى المناسبات اللى تخص شغلى أو ما شابه وفيها بحب ابقى متجددة ومختلفة وبوشوش مختلفة.. وأحب أشوف نفسي كل مرة غير التانية.. وده بنحتاجه كتير كممثلين في أداء شخصيات مختلفة".

وتابعت "ودا معناه إنى باحب أجرب كل اللوكات وبابقى مبسوطة وفى لوكات بتعجبنى وفى لوكات لاء.. والحقيقة بما إنى بحب الموضة وكل ما يخصها فبتابع آخر صيحات الموضة، وفى نفس الوقت ممكن أحب لوكات قديمة برده وتستهويني، لأنه مهما لفينا ودورنا هنلاقى إن الموضة بتعيد نفسها وتتكرر على مدار الوقت".

واستطردت "أحب أوضح إن آخر لوك ليا اخترناه أنا وفريق العمل بعناية فائقة والحقيقة هو عاجبنى جدًا من فستان أو شعر أو مايكب "اتظلموا " فى إضاءة ماكنتش أحسن حاجة، واحترم وجهات النظر المختلفة طول ما هى بتتقال باحترام وتحضر.. أما عن الناس اللى عندها إصرار على "التنمر" وعندها إصرار على توجيه ألفاظ خارجة عن إطار التحضر والأخلاق والأدب والاحترام، فللأسف أحب أقولكم "بصوا فى المراية وعدوا 10 وفكروا كدا بهدوء" للأسف مفيش أي فايدة عادت عليكم غير أنكم ارتكبتم غلط فى حق نفسكم.. شكرًا".

واشتهرت الفنانة لقاء الخميسى بعدد كبير من الأعمال الفنية، ابرزها دورها كزوجة أشرف عبد الباقى فى مسلسل "راجل وست ستات" الذى حقق نجاحاً واسعًا على مستوى الوطن العربي.